Nëse do të ishte e lehtë për t’u bërë të pasur, sot bota do të kishte më shumë milionerë. Nuk mjafton vetëm vizioni për të fituar më shumë para. Ju duhet të jeni realist. Ju keni nevojë për një plan strategjik dhe afat kohor të organizuar.
Një nga gjërat e para që duhet kuptuar rreth milionerëve është që ata mendojnë dhe veprojnë ndryshe nga personi mesatar.
Entrepreneur sjell një listë prej gjashtë faktorëve përcaktues në të cilët duhet të përqendroheni ndërsa filloni rrugëtimin drejt pasurimit.
Milionerët zotërojnë tipare dhe aftësi unike
Ju duhet të filloni të mendoni dhe veproni sikur tashmë e keni arritur qëllimin tuaj të madh. Milionerët kalojnë kohë duke menduar për ide dhe metoda të reja në vend që të merren vetëm me operacionet e përditshme të biznesit të tyre, duke zgjeruar kështu mendjen e tyre dhe duke përtërirë mënyrat e të menduarit dhe të vepruarit.
Milionerët janë mendimtarë afatgjatë
Ata mendojnë për të ardhmen dhe qëllimet afatgjata në vend të kënaqësisë së menjëhershme. Ata mendojnë për zhvillimin e disiplinës dhe kjo u lejon atyre të shohin pamjen e madhe të gjërave. Mbajeni vizionin tuaj qartë në mendjen tuaj derisa të arrini rezultate përfundimtare dhe të shijoni fitoren tuaj.
Milionerët e përqafojnë ndryshimin
Ndryshimi ndonjëherë mund të jetë frikësues, por frika nga e reja gjithashtu ju pengon në krijimin e mundësive. Milionerët e kuptojnë se ndryshimi, qoftë ai pozitiv apo negativ, prapë do t’u sjellë atyre dobi në një farë mënyre. Ky mentalitet nga ana tjetër krijon më shumë vetëbesim dhe siguri në vetvete, duke rritur ndjenjën që pavarësisht se çfarë pengese ndodhet në rrugën tuaj, ju mund ta përballoni atë.
Milionerët janë shumë të vendosur
Mos mendoni se paratë janë motivuesi i tyre i vetëm. Më shpesh, është pasioni i tyre ose një mision në jetë që i shtyn të ecin në një rrugë të pashkelur. Ju duhet të jeni në gjendje të gjeni qëllimin tuaj, pasionin tuaj që ju motivon të kapërceni çdo pengesë që hasni në rrugën tuaj. Pyesni veten, “si mund të bëj një milion dollarë në vit duke bërë atë që dua?”.
Milionerët janë të gatshëm të ndërmarrin rreziqe
Ju duhet të mësoheni që të mos e mënjanoni rrezikun. Mënyra më e mirë për ta bërë këtë është të llogarisni raportin tuaj të rrezikut/shpërblimit si një parashikues i kthimit të investimit.
Milionerët nuk ndalojnë kurrë së mësuari
Të bëhesh milioner kërkon përmirësimin e njohurive tuaja me informacion të ri që ndihmon në krijimin e më shumë mundësive. Lexoni më shumë libra të vetë-përmirësimit dhe gjeni mentorë dhe njerëz të tjerë të suksesshëm për t’iu mbështetur dhe udhëhequr. Ndërsa vazhdoni të zgjeroni horizontet tuaja, mundësitë për prosperitet nuk do të mungojnë.
Milionerët nuk mendojnë vetëm për sukses; ata marrin 100 përqind përgjegjësi për të dhe bëjnë gjithçka që duhet për të arritur qëllimet e tyre. Bëhuni një “veprues”, përqendrohuni në fitoren e madhe dhe mos lejoni asgjë t’ju ndalë në rrugën drejt arritjes së ëndrrave tuaja. /Telegrafi/