Deputeti Gëzim Kelmendi nga partia Fjala ka thënë se presidenti në ardhje, Hashim Thaçi, ka qenë në shtëpinë e tij, ku atij i janë ofruar pozita ministrore e diplomatike, në këmbim për pjesëmarrje në seancën e Kuvendit dhe votën për president.
“Kam mundur shumë lehtë të ndryshojë fjalën, por i kam qëndruar besnik votuesve”, ka thënë Kelmendi në Rrokum Roll të Rrokum TV.
“Po, ka qenë (Thaçi) bashkë me figurat më me ndikim në Pejë e në Kosovë. Ne si shqiptarë e kemi parim ta nderojmë mikun kur na vjen në konak”, u përgjigj Kelmendi në pyetjen e moderatorit se a është e vërtetë që Thaçi ka qenë në shtepinë e tij.
Ai shtoi se Thaçi i ka ofruar poste ministrore Kelmendit, madje poste edhe në diplomacinë kosovare.
“Ne e dimë që kushti për të qenë një parti politike e suksesshme është drejtësia. Zgjedhja e Thaçit (President) nuk do ta lehtësojë barrierën mes dy blloqeve politike pozitë-opozitë”, tha ai.
Ai tha se partia e tij është kundër dy marrëveshjeve, asaj për Asociacionin e Komunave Serbe dhe tjetrës për Demarkacionin me Malin e Zi, por ai theksoi se ata janë edhe kundër dhunës që po përdoret.
“Janë shumë arsye që vendi mundet të shkojë në zgjedhje, Gjykata Speciale, ndikimi i partisë më të madhe PDK, dhe mundësia që Thaçi mund ta çojë në zgjedhje vendin për t’u bërë shpëtimtari i kësaj situate”, tha Kelmendi.
Ai vlerësoi se nëse shkohet në zgjedhje, shumica e partive kanë për të bërë koalicione, ndërsa për partinë e tij ai tha se është duke planifikuar të shkojë vetë në zgjedhje, edhe pse nuk e mohoi që është duke bërë bisedime për koalicion.
https://www.youtube.com/watch?v=Nqfudmn5PAY