Punëtorët e Korporatës Energjetike të Kosovës (KEK), të cilët i kanë mbushur 10, 20 dhe 30 vjet përvojë pune, në periudhën 2015-2017 do ta gëzojnë të drejtën që të marrin pagat jubilare. Kështu thuhet në vendimin që është marr nga kjo ndërmarrje.
Në anën tjetër, Sindikata e Re në Korporatën Energjetike të Kosovës (SR-KEK), paralajmëron padi gjykatë nëse ky vendim nuk ndryshohet.
Nënkryetari i SR-KEK, Nexhat Llumnica, për Telegrafin ka thënë se vendimi është i padrejtë dhe se duhet të jetë në vazhdimësi.
“Për ne është një vendim i padrejtë, për arsye se duhet të jetë në vazhdimësi se kur do që e mbush vitin jubilar dhe jo vetëm deri në vitin 2017 dhe të ndërpritet. Ne besojmë se Marrëveshja Kolektive në shumë vende duhet të miratohet dhe KEK-u është dashur ta vazhdoj. Ndërsa për periudhën 1985 që janë punësuar, do me thënë e kanë bërë 30-vjeçarën më herët është dashur t’i jepen tri paga për arsye se ai i ka përcjell të gjitha gjeneratat që shkojnë duke i marr pagat jubilare e ai mos t’i merr është një diskriminim”, tha Llumnica.
Ai tha se kanë kërkuar një takim me menaxhmetin e KEK-ut në mënyrë të ndryshohet ky vendim, sipas tij, në të kundërtën do të organizohet protestë dhe do të ketë padi në gjykatë.
“Në rast se KEK-u nuk vazhdon që t’i jap pagat jubilare për të gjithë punëtorët, ne e kemi bërë një kërkesë në rast se ata nuk dëshirojnë të merren me ne apo nuk do ta marrin kërkesën tonë, ne duhet të bëjmë edhe protestë për këtë arsye dhe absolut padi në mënyrë që mos t’iu ndalet kjo pagesë punëtorëve”, tha Llumnica, shkruan Telegrafi.
Drejtori menaxhues i KEK-ut, Njazi Thaçi, në një intervistë për Emisionin “EKONOMI” në Telegrafin ka sqaruar se cilët punëtorë janë përfituesit nga ky vendimi.
“Në bazë të një sugjerimi të Zyrës së Ligjore të KEK-ut, unë e kam marr një vendim që t’iu pranohen të gjithë punëtorëve tonë pagat jubilare konform Marrëveshjes Kolektive të nënshkruar 2015-2017, të gjithë ata punonjës që e gëzojnë këtë iu takon paga jubilare. Të gjithë ata që i kanë bërë 10 vjet përvojë pune në atë periudhë apo 20 vjet dhe 30 vjet iu takojnë pagat jubilare”, ka treguar Thaçi.
Sipas vendimit të nënshkruar nga drejtori menaxhues i KEK-ut, të gjithë ata që janë punësuar në vitin 1985, 1986, 1987, 1995, 1996, 1997, 2005, 2006, 2007 i marrin pagat jubilare, ndërsa ata që janë punësuar para vitit 1985 sipas këtij vendimi të KEK-ut nuk do t’i marrin paga jubilare. /Telegrafi/
