Korporata Energjetike e Kosovës e ka anuluar për të dytën herë tenderin për furnizim me mazut, shkruan sot Koha Ditore.
Një komision i ri për vlerësimin e ofertave i themeluar nga KEK-u ka vendosur që t’i eliminojë nga gara të gjitha kompanitë që kanë dorëzuar oferta për tenderin 6-milionësh. Komisioni ka gjetur lëshime në secilën nga ofertat e operatorëve që kanë qenë në garë.
Me gjithë vendimin, KEK-u e ka pasur të pamundur që njoftimin për anulim ta publikojë në ueb-faqen e Komisionit Rregullativ të Prokurimit, pasi të tri kompanitë janë ankuar në Gjykatën e Tenderëve. Ky tender do të shqyrtohet nga Organi Shqyrtues i Prokurimit për të tretën herë.
Edmond Nulleshi, shef i shërbimeve të KEK-ut, thotë se që nga fundi i vitit të kaluar ky tender është duke u përsëritur për shkak të arsyeve, që, sipas tij, nuk janë nën kontrollin e KEK-ut. /koha/