Bujar Jupaj, drejtor i sistemit të operimit në KEDS sot në një konferencë për media ka thënë se planifikimi i reduktimeve të energjisë elektrike 8 me 2 është zbatuar me përpikëri por problemi ka qenë te mbingarkesa për çka disa lagje kanë pasur mungesë më të madhe të energjisë elektrike.
Ai më tej tha se nuk është privilegjuar askush përveç institucioneve shëndetësore.
“…Ajo që garantojmë është se planifikimi është zbatuar në përpikëri por çka ka ndodhë pas planifikimit, siç e ceka në moment kur kemi ngarkesa të mëdha, p.sh. një dalje ka qenë e mbingarkuar dhe nuk e ka pranuar…”, tha ai, duke potencuar se mbingarkesa ka çuar në ndërprerje më të gjata të rrymës në disa lagje.
Jupaj më tej u shpreh se KEDS ka angazhuar 400 punëtorë që të rikthejë energjinë sa më shpejt”.
Ndërkaq, lidhur me gjendjen energjetike në vend ka folur edhe zëdhënësi i KEDS-it, Viktor Buzhala.
Ai ka prezantuar tre faktorë që kanë përkeqësuar situatën me energjinë elektrike.
“Sipas analizave që janë bërë janë tre faktorë që ndikojnë direkt në përkeqësimin e kësaj gjendje, është rritja e madhe e konsumit të energjisë. Pamjaftueshmëria e prodhimit dhe kriza ndërkombëtare që i ka rritur çmimet…”, u shpreh Buzhala.
Ai bëri të ditur se konsumi ka arritur deri në 1400 megavat orë që nuk është shënuar asnjëherë në historinë e korporatës.
Buzhala ka folur edhe për kritikat e PSD, ndërsa tha se për konstatimet e kreut të PSD-së, Dardan Molliqajt, po merret zyra ligjore.