Me fillim e Superligës së Basketbollit të Kosovës, shumë klube kanë pasur mundësinë që të shohin një pasqyrë më të qartë të basketbollistëve me të cilët janë përforcuar.
Një mundësi të tillë e ka pasur edhe klubi i basketbollit Vëllaznimi, i cili gjatë afatit kalimtar është përforcuar me 6 basketbollistë të huaj, por që pas ndeshjeve të zhvilluara në kuadër të Superkupës dhe dy xhirove të para në Superligë, klubi nga Gjakova ka vendosur të ndërpresë bashkëpunimin me dy basketbollistët e transferuar nga ShBA, Chandler Lawson dhe Tedrick Wilcox.
Wilcox pati rastin që të paraqitej në ndeshjen që KB Vëllaznimi e zhvilloi kundër KB Prishtina në kuadër të Superkupës së Kosovës në basketboll, ku në 21 minuta lojë arriti të shënojë 7 pikë, ndërsa Lawson, nuk u paraqit në asnjë ndeshje zyrtare me skuadrën nga Gjakova.
Ndërsa sa i përket përforcimeve të tjera, kujtojmë që pas një lëndimi të pësuar në dorë i është pamundësuar debutimi basketbollistit Arian Azemi, i cili sipas asaj që ka kuptuar Telegrafi pritet që të jetë i gatshëm në ndeshjen që Vëllaznimi do ta zhvillojë kundër KB Trepça në kuadër të xhiros së tretë të Superligës së basketbollit kosovar. /Telegrafi/