Ministria e shëndetësisë e Kazakistanit tha të dielën se 164 persona janë vrarë në protestat që kanë tronditur vendin gjatë javës së kaluar.
Sipas Euronews, përcjell Telegrafi, shifrat e raportuara në kanalin shtetëror të lajmeve Khabar-24 janë një rritje e konsiderueshme nga të dhënat e mëparshme.
Nuk është e qartë nëse vdekjet u referohen vetëm civilëve apo nëse përfshihen vdekjet nga forcat e rendit.
Autoritetet kazake thanë më herët të dielën se ishin vrarë 16 policë ose roje kombëtare, numër ky që dallon gjithashtu me një numër të raportuar më herët që ishte 26.
Shumica e vdekjeve – 103 – ishin në Almaty, qyteti më i madh i vendit, ku demonstruesit morën ndërtesat qeveritare dhe i vunë flakën disave, sipas ministrisë.
Avokati i Popullit i vendit për të drejtat e fëmijëve tha se tre nga të vrarët ishin të mitur, përfshirë një vajzë 4-vjeçare.
Ministria më herët raportoi se më shumë se 2,200 njerëz kërkuan trajtim për lëndimet nga protestat, dhe Ministria e Brendshme tha se rreth 1,300 oficerë sigurie u plagosën.
Zyra e presidentit të Kazakistanit tha se rreth 5,800 njerëz u arrestuan nga policia gjatë protestave që u shndërruan në dhunë javën e kaluar dhe nxitën një aleancë ushtarake të udhëhequr nga Rusia për të dërguar trupa në këtë vend.
Zyra e Presidentit Kassym-Jomart Tokayev tha të dielën se gjendja është stabilizuar në vend dhe se autoritetet kanë rifituar kontrollin e ndërtesave administrative që u pushtuan nga protestuesit, disa prej të cilave u dogjën. /Telegrafi/