Prokurori speciale duhet të ketë, por ky është organ politik i formuar nga bashkësia ndërkombëtare për ta rrëzuar pushtetin aktual, thotë ish-ambasadori Risto Nikovski, duke e analizuar punën gjashtëmujore të prokurorisë.
“Të njëjtën ditë kur u formua ajo dhe kur dhanë betim solemn, duhej që materialet e përgjuara t’i merrnin me forcë. Kur u bë dorëzimi i tyre, është dashur të kërkohen dy deklarata të certifikuara në noter nga dorëzuesi Zoran Zaev. Deklarata e parë, se i jep të gjitha materialet që i ka, dhe e dyta, se këto materiale, nuk i janë dhënë askujt për përdorim të mëtutjeshëm”, tha Nikovski, njofton Tv21.
Koordinatori i komitetit për mbrojtje dhe drejtësi Vane Cvetanov, konsideron se Prokuroria speciale është institucion i vetëm në vend që punon sipas ligjit, dhe jo me direktiva partiake.
“U krijua një situatë ku partia qeverisëse u gjend në rrezik të drejtpërdrejtë për ndjekje penale, sepse Prokuroria speciale gjeti indikacione serioze që flasin për mashtrime zgjedhore dhe marrje të pushtetit nëpërmjet falsifikimeve zgjedhore. Partia në pushtet u gjend nën trysni se mund të rrëzohet si kullë prej letre”, theksoi Cvetanov.
Ish ministri i drejtësisë Mersim Pollozhani pajtohet me Nikovskin se Prokuroria speciale duhet të ekzistojë, por nuk pajtohet me qëndrimin se e njëjta është formuar nga bashkësia ndërkombëtare.
“Prokuroria Speciale ndodhet në fillim të punës së saj. Ende është duke punuar në grumbullimin e provave. Mendoj se do të ketë sukses në këtë punë sepse ka mbështetje nga publiku i gjerë, pavarësisht qëndrimeve të tyre politike”, tha Mersim Pollozhani.
Për gjashtë muaj, Prokuroria speciale ndërmori procedurë para-hetimore për parregullsi zgjedhore. Rastin e quajti “Titanik”. 15 marsi është afati i fundit kur Prokurorja speciale publike duhet të dorëzojë raport 6 mujor për punën e saj./Telegrafi/
