Italia, Lituania, Austria dhe Spanja janë katër vendet e eurozonës që rrezikojnë të shkelin rregullat e Bashkimit Europian mbi buxhetin gjatë vitit të ardhshëm.
Diçka e tillë bëhet e ditur nga Komisioni Europian. Edhe Franca vlerësohet se nuk do të arrijë disa prej objektivave fiskale të paracaktuara mes vendeve antare. Komisioni Europian që është krahu ekzekutiv i Bashkimit Europian, vlerëson çdo vit projekt buxhhetet e vendeve anëtare për të vlerësuar nëse ato janë në përputhje me paktin e rritjes dhe stabilitetit.
Rregulli numër një është limiti i defiçitit buxhetor, i fiksuar në 3% të Prodhimit të Brendshëm Bruto. Disa prej vendeve antare tashmë kanë kërkuar që për shkak të krizës së emigrantëve dhe shpenzimeve që lidhen me të, situata të cilësohet si e jashtëzakonshme dhe të hiqen disa kufizime. Vetë kreu i Komisioni Europian, Jean-Claude Juncker e ka konfirmuar diçka të tillë, transmeton ScanTV.
Sipas tij, lehtësimet do ti mundësohen vetëm atyre vendeve që e meritojnë. Komisioni Europian pritet të saktësojë se si do të aplikohen këto lehtësime dhe kujt i takojnë. Vende si Spanja dhe Italia ndërkohë, rrezikojnë një buxhet jashtë rregullave edhe sikur t`iu mundësohen këto lehtësime. /Telegrafi/