Kryetari i komunës së Kamenicës, Qëndron Kastrati, i është drejtuar me një letër Sindikatës së Bashkuar të Arsimit të Kosovës, ku kjo e fundit është duke kundërshtuar reformat në arsim që janë duke u bërë në këtë Komunë.
Kastrati në një postim në llogarinë e tij në Facebook ka shkruar se SBASHK-ut i është drejtuar për t’ia kujtuar se angazhimi i komunës së Kamenicës për cilësi në arsim ka dëshmuar që nga riorganizimi do të përfitojnë nxënësit.
Ai ka shkruar se do të ndjekin të gjitha procedurat administrative, civile, dhe sipas tij edhe penale për të mos lejuar që siç tha ai obstruksionet me prapavijë politike të dëmtojnë nxënësin, të hutojnë prindin, dhe shantazhojnë mësuesin.
Postimi i plotë:
Edhe një herë i jemi drejtuar SBASHK-ut për t’ia kujtuar se:
Angazhimi ynë për cilësi në arsim ka dëshmuar që nga riorganizimi do të përfitojnë nxënësit
Ne kemi u bërë ofertë për avancim e të drejtave të punëtorit arsimor duke propozuar Kontratën në nivel të ndërmarrjes
Jemi angazhuar për sqarime dhe dëgjim të kërkesave të sindikatës të cilët kanë refuzuar të na dëgjojnë, kuptojnë dhe nuk ua kanë përcjellë anëtarëve të tyre, kushtet dhe benefitet e nënshkrimit të kontratës.
Të gjitha veprimet tona janë brenda kornizës ligjore dhe kompetencave.
Bojkotimi i këtij procesi nga SBASHK dhe pengimi i mbarëvajtjes në mësim bazohet kryekput në historinë e praktikave shantazhuese e politike.
Veprimet e SBASHK-ut i tejkalojnë sferën e përgjegjësisë dhe autorizimit të tyre ligjor.
Mungesa e konstruktivitetit nga përfaqësuesit sindikal i kushton nxënësit.
Andaj, ne do të ndjekim të gjitha procedurat administrative, civile, dhe madje penale për të mos lejuar që obstruksionet me prapavijë politike të dëmtojnë nxënësin, të hutojnë prindin, dhe shantazhojnë mësuesin./Telegrafi/
