Kryetari i Kamenicës Qëndron Kastrati ka folur për situatën shëndetësore në këtë komunë në raport me pandeminë.
Kastrati në RTV Dukagjini ka thënë se 185 persona nga Kamenica presin në radhë për t’u testuar.
Ai ka thënë se ndërkohë 16 mostra janë marrë dhe sonte pritet të dalin rezultatet për ta.
“Këta janë raste kontakti të dy personave të fundit që kanë rezultuar pozitiv me COVID-19”, tha ai, përcjell Telegrafi.
Ashtu si në komunat tjera, edhe në Kamenicë vendimi i qeverisë për masat e reja kufizuese është pritur me befasi.
“Mbrëmë ka qenë një ditë shqetësuese pasi qytetarët kanë dalë me të madh për t’u furnizuar me materiale apo para”, thotë Kastrati, duke shtuar se sot në ditën e parë ka pasur kërkesa të mëdha ën komunë për leje të ndryshme të qarkullimit.
Duke folur për rastet e prekura nga Kamenica, Kastrati thotë se me përjashtim të një personi që është në gjendje pak më të rëndë të tjerët janë në gjendje shëndetësore të mirë./Telegrafi/