Megjithëse stacionet publike janë një zgjidhje për të karikuar telefonat tuaj, ekspertët paralajmërojnë se kjo gjë mund të paraqesë rrezik.
Sipas tyre, karikimi i telefonave në vende publike mund t’ju jep hapësirë hakerëve që të kyçen në informatat e juaja personale.
“Në varësi të mundësive që ata shfrytëzojnë, hakerët mund të kenë qasje në gjithçka që keni në telefonin tuaj”, ka thënë eksperti i sigurisë në internet, Jim Stickley, përcjell Telegrafi.
Hakerët mund të qasen sipas një praktike “Juice Jacking”, thonë ekspertët.
Praktika, e njohur “Juice Jacking”, ndodh kur njerëzit futin telefonat e tyre në një port karikimi, ndërsa hakerët përdorin softuerin në stacionin e karikimit ose kabllo të USB-së për të lidhur informacionet e tyre, siç janë numrat e telefonit dhe fjalëkalimet.
Ky mashtrim ka bërë që autoritetet lokale, përfshirë Zyra e Prokurorit të Qarkut në Los Angeles të marrin masa.
Ata kanë paralajmëruar qytetarët që të kenë kujdes kur karikojnë telefonat e tyre, sidomos të shmangin vendet si aeroporte ose qendra tregtare.
“Ndonëse stacionet publike ju ofrojnë karikimin e telefonave tuaj falas, llogaritë tuaja bankare mund të përfundojnë të sulmuara”, ka thënë zëvendësprokurori i Qarkut në Los Angeles, Luke Sisak.
Për të zbuluar se sa e lehtë mund të jetë për një haker, qasja e tyre në një telefon gjatë karikimit, Stickley, e demonstroi sipas një shembulli.
Ai realizoi një simulim përgjatë Portit të San Diego në Kaliforninë Jugore.
Përmes pajisjeve speciale të instaluara në një stacion të karikimit, Stickley ishte në gjendje të shikonte dhe regjistronte gjithçka që tregohet në ekranin e tij, të një telefoni të karikuar.
“Tani arrijmë në pjesën më të mirë. Po futet në numrin e kartës së saj të kreditit”, tha Stickley pasi u qas në telefonin e dikujt.
Për këtë rast një grua e identifikuar si Ruth, është bërë pjesë e këtij eksperimenti, ndërsa ajo i dha leje Stickleyt që të hyjë në telefonin e saj përmes stacionit ku ajo mbush telefonin, dhe të demonstrojë llojin e informacionit që merret nga pajisja e saj.
Në pak sekonda, mesazhet e saj personale në Facebook u shfaqën një monitorin e Stickleyt.
“Është e rrezikshme”, tha Ruth.
Kështu, Zyra e Prokurorit të Qarkut në Los Angeles County tha që rekomandon përdorimin e prizave elektrike në vend të stacioneve të posaçme për mbushjen e telefonave, dhe blerjen e karikuesve të lëvizshëm që mund të përdoren në lëvizje. /Telegrafi/