Kryetari i Këshillit Gjyqësor Zoran Karaxhoski u arsyetua se në Gjevgjeli nuk kontrolloi ligjshmërinë e urdhrit të gjykatës për bastisjen e Vlladimir Pançevski, por ai vetëm inspektoi vendimin e gjykatës.
Megjithatë Karaxhoski, edhe përskaj insistimit të gazetarëve nuk shpjegoi arsyen e reagimit të menjëhershëm të Këshillit Gjyqësor i cili ishte në Gjevgjeli disa ditë pasi që PSP-ja bastisi gjykatësit Vlladimir Pançevski të cilit i mori 2 telefona dhe kompjuterin.
Karaxhovski ka shmangur përgjigjet se a do të mbajë përgjegjësi nëse konfirmohen dyshimet e komisionit nga Ministria e Drejtësisë se sistemi AKMIS për shpërndarjen elektronike të lëndëve nuk ka funksionuar për vite dhe u keqpërdor në gjykatën penale.
“Unë nuk kam një koment, atë çfarë kam menduar ta them e kam thënë deri më tani. Jam duke pritur raportin e komisionit”, tha Zoran Karaxhoski.
Zoran Karaxhoski dhe shefi i Gjykatës Supreme Jovo Vangellovski, siç thonë ata, në një veprim jo të koordinuar, vizituan Gjykatën e Gjevgjelisë. Të dy deklaruan arsye të ndryshme, Vangellovski tha se ai kontrolloi AKMIS-in ndërsa Karaxhovski e inspektoi urdhërin e bastisjes tek Pançevski.
