Gazetari i cili parashikoi shpërbërjen e ish-Jugosllavisë, në kohën kur perëndimi ishte përqendruar tek Evropa Qendrore, sot profesor në Akademinë e Marinës, është shprehur se kemi përpara një rrugë të vështirë, mirëpo beson se gjeografia përcakton fatin dhe Serbia do të jetë pjesë e Bashkimit Evropian.
“Ajo kufizohet me të paktën tri vende, që ose janë në Bashkimin Evropian, ose po futen në Bashkimin Evropian. Kështu që mendoj se në fund të fundit, Rusia nuk e ka ndikimin e duhur për të rivendosur në Ballkan pozitën që kishte gjatë Luftës së Ftohtë”, vlerësoi Kaplan.
Kaplan mendon se Bashkimi Evropian ka më shumë në dorë lidhur me statusin e Kosovës, sesa Rusia. Ai parashikon që zgjidhja e statusit të Kosovës do të zvarritet, pasi Shtetet e Bashkuara kanë tani më pak ndikim sesa do të kenë pas një viti e gjysmë.
Sidoqoftë, profesor Kaplan vlerësoi se mënyra më e mirë për ta zgjidhur aspektin historik veçanërisht në Kosovë, është që t’i jepet pakicës serbe garanci absolute.
“Mund të mos kenë mbetur shumë serbë në Kosovë, por aty janë shumë manastire dhe aty kanë ndodhur shumë ngjarje të historisë serbe. Kështu që mënyra sesi do të trajtohet çështja e të kaluarës historike është që pakicave t’u jepen të drejta të paprekshme”. /VoA/