Agim Shahini, drejtues i Aleancës Kosovare të Biznesit, tha se një numër i madh i kërkesave të bizneseve për kredi, presin me muaj të tërë shqyrtimin nga bankat, pavarësisht normave, siç i quan ai, të këqija të interesit. “Bankat në Kosovë kanë interesin më të lartë – deri në 18 për qind. Kjo i dëmton investimet, i dëmton bizneset dhe i dëmton të gjithë ata që tentojnë të hyjnë në biznes. Është e pamundur që dikush të ketë kapital të freskët për të hyrë në biznes pa mbështetje të bankës”, theksoi Shahini.
Eksperti për ekonomi, Musa Limani, drejtues i Institutit Ekonomik të Kosovës, tha se kreditë bankare në Kosovë nuk krijojnë kushte për zhvillimin e bizneseve. Sipas tij, politika kreditore parqet një instrument shumë të rëndësishëm të qeverisë, përmes së cilës ajo orienton dhe zbaton qëllimet e parashtruara zhvillimore.
Limani thotë se në Kosovë, qeveria nuk mund të intervenojë te bankat për të bërë një politikë të drejtë dhe të shëndoshë që është në funksion të biznesit vendor. Si pasoj e kësaj, shton Limani, bankat në Kosovë i bëjnë vetë politikat kreditore.
“Sipas të gjitha gjasave, këto banka kanë bërë një marrëveshje të fshehtë në mes vete dhe janë dakorduar që norma e kamatës për kreditë e dhëna të jetë diku rreth 15 për qind mesatarisht. Kjo është normë e papërballueshme për biznesin dhe ngarkesë shumë e madhe”, deklaron Limani.
Ai thotë se normat e larta të interesit zvogëlojnë interesimin për kredi, gjë që ndikon në zvogëlimin e investimeve. Sipas Limanit, investimet e vogla nuk mundësojnë hapjen e vendeve të reja të punës, andaj, shton ai, vjen deri të zvogëlimi i prodhimit dhe largimi i punëtorëve nga vendet e punës.
Ndërkaq, Agim Shahini thotë se bankat nuk duhet t’i shikojnë bizneset vetëm si kredimarrëse, por edhe si partnere në zhvillimin e ekonomisë së Kosovës.
Sipas drejtuesve të Aleancës Kosovare të Biznesit, gjatë këtij viti në Kosovë janë mbyllur mbi 1,300 biznese për arsye të ndryshme, por në shumë raste si pasojë e pamundësisë së kthimit të kredisë, për shkak të normës së lartë të interesit. /Rel/Telegrafi/