Filmbërësi i njohur amerikan, Larry Cohen, ka ndërruar jetë në moshë 82 vjeçare në shtëpinë e tij në Beverly Hills të Kalifornisë.
Producenti, skenaristi dhe regjisori ka qenë më së shumti i njohur për disa seriale të suksesshme televizive, si edhe për shumë filma të zhanrit horror.
Zëdhënësi i familjes së tij, Jeff Sanderson, ka treguar se Cohen kishte vuajtur nga kanceri dhe ka ndërruar jetë pikërisht si pasojë e kësaj sëmundjeje vdekjeprurëse.
Ai u bë i njohur fillimisht si skenarist kah fundi i viteve të pesëdhjeta duke shkruar skenarë për seriale që asokohe ishin shumë të suksesshme. Ndërsa në vitin 1972 e bëri regjinë dhe ishte producent i filmit të parë, “Bone”.
“It’s Alive” (1974), “God Told Me To” (1976), “It Lives Again” (1978), “The Stuff” (1985), “A Return to Salem’s Lot” (1987), “Phone Booth” (2002), “Cellular” (2004), “Captivity” (2007) – janë disa prej filmave të tij më të suksesshëm. /Telegrafi/