Kryeprokurori i ri shtetëror, Ljubomir Joveski, sot njoftoi se për ngjarjen tragjike në të cilën humbi jetën 4-vjeçari, Almir Aliu, veprohet në mënyrë joselektive, të paanshme, profesionale dhe mbi bazë të ligjit.
Joveski ju bëri apel partive politike të mos bëjnë presion dhe të mos përzihen në punën e Prokurorisë Publike, njofton Telegrafi Maqedoni.
“Prokurorët e kryejnë punën e tyre dhe vendimet do t’i sjellin mbi bazë të ligjeve dhe fakteve të dorëzuara. Me ardhjen time në funksionin e kryeprokurorit, kam premtuar se vendimet nuk do të sillen në bazë të dëshirave partiake ose qendrave tjera. Profesionalizimi dhe kthimi i besimit në prokurorinë, i kam bazë gjatë kryerjes së funksionit”, thotë Joveski në deklaratë.
Ai apeloi që gjatë komentimit dhe vlerësimit të kësaj vepre penale të merren parasysh gjitha dëshmitë dhe provat.
Joveski në fund shton se përderisa partitë dyshojnë në punën e tij dhe kanë vërejtje, mund të kërkojnë shkarkimin e tij./Telegrafi/