Joe Biden dhe Donald Trump janë ende shumë afër njëri-tjetrit në sondazhe përpara zgjedhjeve të nëntorit.
Dhe me tetë muaj para asaj që duket se do të jetë një ripërsëritje e garës së 2020-ës, Biden e mposht Trumpin ngushtë në dy nga gjashtë sondazhet e fundit serioze, Trump kryeson në tre dhe një është i barabartë, sipas koleksionit të sondazheve kombëtare të FiveThirtyEight, shkruan Newsweek, përcjell Telegrafi.
Ndryshe, Trump pritet të sigurojë nominimin presidencial republikan në zgjedhjet e vitit 2024, pasi sondazhet sugjerojnë se ai do të fitojë nga Nikki Haley në të gjitha 16 garat që do të zhvillohen më 5 mars.
Biden, i cili nuk kishte sfida serioze në primaret nga Demokratët, gjithashtu duhet të konfirmohet së shpejti si kandidati demokrat.
Siç thekson Newsweek më tej, më 4 mars, një sondazh i Morning Consult me 6,334 votues të regjistruar i dha Biden-it një shtysë në shpresat e tij për rizgjedhje duke i dhënë atij një epërsi me një pikë mbi Trump (44 për qind në 43 për qind).
Në të njëjtën ditë, u publikua një sondazh i I&I/TIPP me 1,246 votues të regjistruar, i cili gjithashtu tregoi Biden me një avantazh të lehtë prej 43 deri në 42 për qind ndaj Trump.
Kur kandidatët e tjerë presidencialë i shtohen përzierjes, duke përfshirë të pavarurit Robert F. Kennedy Jr. dhe Cornel West, dhe Jill Stein e Partisë së Gjelbër, Biden dhe Trump janë të barabartë me 38 për qind.
Ndërsa një sondazh i CBS News/YouGov i publikuar më 4 mars tregoi se Trump ka një epërsi prej katër pikësh mbi Biden (52 për qind në 48 për qind), me votuesit e mundshëm që besojnë gjithashtu se Trump ka një shëndet më të mirë fizik dhe njohës sesa presidenti.
Ndërkohë më 3 mars, një sondazh i New York Times/Siena i dha Trumpit një epërsi prej pesë pikësh ndaj Bidenit (48 për qind në 43 për qind) midis 980 votuesve të regjistruar, si dhe një epërsi prej katër pikësh midis atyre që thanë se “ka të ngjarë për të votuar në nëntor (48 me 44 për qind).
Gjithashtu më 3 mars, një sondazh me 1,262 votues të regjistruar – i kryer nga Fox News me Beacon Research dhe Shaw & Company Research në të njëjtën kohë me sondazhin e New York Times – tregoi se Trump kishte 49 për qind mbështetje kundër 47 të Bidenit.
Dhe një sondazh i Reuters/Ipsos i publikuar më 29 shkurt tregoi se Biden dhe Trump janë të barabartë me 38 për qind. /Telegrafi/