Papa Françesku “nuk është jashtë rrezikut” dhe do të qëndrojë në spital edhe për të paktën një javë, kanë njoftuar mjekët që po e trajtojnë.
Sergio Alfieri, shefi i ekipit mjekësor të Papës, tha: “A është jashtë rrezikut? Jo. Por nëse pyetja është “a është në rrezik për vdekje”, përgjigja është “jo”.
Bëhet e ditur se Papa 88-vjeçar po trajtohet për pneumoni të dyfishtë dhe bronkit kronik në spitalin Gemelli të Romës.
Françesku ishte prekur nga gripi sezonal përpara se të dërgohej në spital më 14 shkurt, shkruan skynews, përcjell Telegrafi.
Mjekët paralajmëruan se ndërsa ai nuk kishte sepsë – ku mikrobet hyjnë në qarkullimin e gjakut – ekzistonte gjithmonë rreziku që infeksioni të përhapej në trupin e tij.
Ata shtuan se ky ishte shqetësimi më i madh.
Dr Luigi Carbone, mjeku personal i Papës, tha se Françesku po përdorte ilaçe pasi pneumonia u diagnostikua në fillim të kësaj jave.
Ai po lufton gjithashtu një infeksion të shumëfishtë të baktereve dhe viruseve në traktin respirator.
Ndryshe, miliona njerëz në mbarë botën kanë qenë të shqetësuar për shëndetin gjithnjë e më të dobët të Papës – dhe gjendja e tij ka shkaktuar spekulime për një dorëheqje të mundshme. /Telegrafi/