Drejtori i shoqatës humanitare “Jetimat e Ballkanit”, Halil Kastrati ka njoftuar se ngjarja e cila është pritur të organizohet me 28 nëntor, në nder të dhjetëvjetorit të shoqatës dhe Festës së Flamurit, do të shtyhet për një datë tjetër, krejt kjo për shkak të tërmetit që ka ndodhur mbrëmë në Shqipëri.
Në këtë ngjarje të këtij viti jubilar për “Jetimat e Ballkanit”, pritej të ndaheshin 128 çelësa për familjet në nevojë.
Kastrati përmes një video – mesazhi ka ngushëlluar familjarët e atyre që kanë humbur jetën, derisa ka thënë se i dëshiron shërim sa më të shpejtë të lënduarëve.
“Në menjëherë kemi nis aksionin për solidarizim me vëllezërit tonë atje, njëkohësisht ju bëjmë thirrje shqiptarëve kudo që janë, që te jemi unik dhe të solidarizohemi në këto ditë të vështira që po i përjetojmë të gjithë së bashku. O zot mbroj shqiptarët kudo që janë, ndërsa juve Zoti ju ruajt e ju shpërbleftë”, ka theksuar ai.
Kastrati përmes profilit të tij në Facebook ka treguar se, ndër të tjera, bashkë me grupin e tifozëve Plisat, do të nisin ndihmat për Shqipëri.
“Lusim Zotin të vdekurit t’i mëshiron, të lenduarit t’i shëron dhe familjet që i humbën më të dashurit e tyre t’i forcon.
Njëkohësisht apelojmë te mbarë kombi jone të solidarizohemi në këtë tragjedi mbarëkombëtare. Zoti na ruajt të gjithëve”, ka shkruar ai. /Telegrafi/
