Joe Biden ka thënë se “nuk është i verbër” ndaj shqetësimeve për moshën e tij, por u ka thënë kritikëve se është “koha për t’i dhënë fund” spekulimeve për të ardhmen e tij në garën presidenciale në SHBA.
Në një letër drejtuar demokratëve në Kongres, presidenti amerikan tha se është “i përkushtuar fort” në fushatën e tij të rizgjedhjes dhe u zotua të mbetet në garën kundër Donald Trumpit, transmeton Telegrafi.
“Dëshiroj që të dini se pavarësisht të gjitha spekulimeve në shtyp dhe gjetkë, jam i vendosur fort për të qëndruar në këtë garë, për ta drejtuar këtë garë deri në fund dhe për të mposhtur Donald Trumpin”, shkroi Biden.
Biden e përfundoi letrën e tij duke thënë: “Çështja se si të ecim përpara është transmetuar mirë për më shumë se një javë tani. Dhe është koha që ajo të përfundojë”.
Përafërsisht në të njëjtën kohë kur letra u publikua, presidenti i SHBA-së telefonoi drejtuesin e emisionit Morning Joe të MSNBC dhe tha se është i bindur se “votuesi mesatar atje” e dëshiron ende atë në biletën e demokratëve.
“Nuk do të shkoj askund. Humbja nuk është një opsion në zgjedhjet e ardhshme”, shtoi presidenti amerikan.
Biden i tha gjithashtu MSNBC se nuk do të “shpjegojë më se çfarë duhet ose nuk duhet të bëj”, duke e bërë të qartë se do të kandidojë.
Ka pasur shqetësime në lidhje me shëndetin dhe aftësinë e presidentit 81-vjeçar, pas një performance të dobët në një debat me Trumpin muajin e kaluar. /Telegrafi/