Ministrja gjermane e Mbrojtjes Christine Lambrecht ka njoftuar zyrtarisht dorëheqjen të hënën.
Lëvizja vjen pasi mediat gjermane raportuan të premten se shefja e mbrojtjes synonte të jepte dorëheqjen pas një mesazhi shumë të kritikuar natën e Vitit të Ri që ajo postoi në mediat sociale, përcjell Telegrafi.
Në mesazhin e saj, Lambrecht kishte përmendur luftën në Ukrainë me zhurmën e fishekzjarreve në sfond.
Anëtarët e Bashkimit Kristian Demokratik (CDU) të opozitës e quajtën mesazhin si “të shurdhër” dhe i kërkuan asaj të jepte dorëheqjen.
Lambrecht është nga Partia Social Demokrate (SPD) e qendrës së majtë të kancelarit Olaf Scholz.
Pas polemikave, Scholz kishte thënë se kishte ende besim te Lambrecht.
Vendimi i saj për të dhënë dorëheqjen vjen pasi Gjermania është nën presion për të miratuar një rritje të mbështetjes ushtarake ndërkombëtare për Kievin dhe aftësitë mbrojtëse të Gjermanisë janë vënë në pikëpyetje pasi disa tanke këmbësorie Puma u vunë jashtë shërbimit gjatë një stërvitjeje të fundit ushtarake. /Telegrafi/