Ministri i Jashtëm i Japonisë, Fumio Kishida tha se vendi i tij duhet të jetë në gatishmëri për shkak të Koresë së Veriut, madje edhe pas përfundimit të kremtimit të “Ditës së Diellit” në këtë vend të izoluar gjatë fundjavës.
Deklarata e Kishida-s erdhi pas paradës së madhe ushtarake me rastin e ditëlindjes së 105 të themeluesit të ndjerë të vendit, Kim Il Sung, e cila mbahet sot në Phenian.
Kishida tha se pret ngjarje të ngjashme në Korenë e Veriut gjatë muajit prill dhe ka shtuar se “ka mundësi që të ndërmarrin veprime në rrethana të tilla”.
Koreja e Veriut ka dhe një festë tjetër të madhe ushtarake, dhe kjo është më 25 prill, kur forcat e armatosura shënojnë ditën e tyre.
“Japonia duhet plotësisht të jetë e gatshme për ndërmarrjen e masave të ndryshme”, tha Kishida duke mos precizuar se për çfarë masash bëhet fjalë, raporton Anadolu Agency.
Në fund, ai shtoi se Qeveria e Japonisë është në kontakt me dhjetëra mijëra shtetas të saj që jetojnë në Korenë e Jugut dhe se kanë një plan për situata të paparashikuara.