Kompania japoneze Tokyo Electron LTD, e cila merret me furnizimin e çipëve, nuk do të furnizojë më klientët kinezë që gjenden në listën e zezë të Uashingtonit, ku kështu ka bërë të ditur një prej ekzekutivëve të lartë të kompanisë.
Vendimi tregon se përpjekjet e Uashingtonit për të penguar shitjet e teknologjisë për firmat kineze, duke përfshirë Huawei Technologies, po ndikojnë edhe tek firma jo-amerikane, të cilat nuk janë të detyruara të ndjekin ligjin amerikan, përcjell Telegrafi.
Kina është përfshirë tashmë në një luftë tregtare paralizuese me Shtetet e Bashkuara të Amerikës. Ajo është angazhuar të ndërtojë industrinë e saj të gjysmëpërçuesve për të zvogëluar vartësinë nga furnizuesit amerikanë, japonezë dhe evropianë për makineritë e prodhimit të çipëve.
“Ne nuk do të bëjmë biznes me klientë kinezë me të cilët Applied Materials dhe Lam Research nuk janë të lejuar të punojnë. Është e rëndësishme për ne që qeveria dhe industria amerikane të na shohin si një kompani të ndershme”, tha një nga drejtuesit e Tokyo Electron LTD.
Përfaqësuesit e kompanive japoneze theksojnë se për këtë vendim nuk kanë marrë asnjë udhëzim nga Ministria japoneze e Industrisë. /Telegrafi/