Në opinion doli informacioni se Fatime Fetai, Lençe Ristovska dhe Katica Janeva kanë pasur mosmarrëveshje dhe se kjo është si shkak i lëndëve të Prokurorisë Speciale Publike (PSP) lidhur me ish-zyrtarë të Qeverisë që vijnë nga parti të ndryshme, përcjell Telegrafi Maqedoni.
Në lidhje me këtë temë është përgjigjur vetë Katica Janeva, kryeprokurore speciale në PSP.
“Këto janë zëra jo serioz, nuk do doja t’i komentoj të tillët. Ju vet e shihni se ne këtu nuk kemi ndërtuar murre ndarëse nëpër zyre. Nuk ka ndarje në grupe në PSP”, i’u përgjigj Janeva gazetarit të emisionit KOD.
Përndryshe, kohëve të fundit në Maqedoni të shumta janë zërat se PSP punon politikisht, duke vepruar me urdhra të pushtetit.
“Jo, nuk punojmë sipas partive politike”, u përgjigj shkurt Janeva.
Ndërsa në lidhje me hetimet për zyrtarë të BDI-së, Janeva tha se nuk ka pengesa në procedurë dhe në hapje të lëndëve.
“Vetëm ka punë për të njëjtat ku janë duke u mbledhur të gjithë faktet dhe dëshmitë”, tha ajo. /Telegrafi/
