Prokurori publik i Maqedonisë Ljubomir Joveski, sot ka mbajtur takim pune me prokuroren speciale Katica Janeva.
Siç njoftojnë nga PSP, në takim është diskutuar për mendimin e Gjykatës së Lartë, e cila dje vendosi që Prokuroria Speciale nuk mund të ngrit akuza dhe të nis hetime të reja pasi i ka kaluar afati prej 18 muajve, njofton Telegrafi Maqedoni.
“Në takim është shqyrtuar edhe gjendja dhe mundësia për veprim të mëtejshëm me lëndët që i posedon PSP. Në këtë kontekst, Joveski dhe Janeva janë dakorduar që veprimi me këto lëndë do të vazhdojë sipas rregullave ligjore”, thuhet në njoftimin e PSP-së.
Ndryshe, pasi dje Gjykata e Lartë vendosi që PSP nuk ka të drejtë të ngrit aktakuza për lëndët që i ka hapur pas skadimit të afatit të saj, në opinion pati reagime ku thuhej se ish-funksionarët do të shpëtojnë nga përgjegjësia për veprat penale që i kanë kryer në të kaluarën./Telegrafi/