Ikonat amerikane të filmit, Jane Fonda dhe Robert Redford, do të marrin çmimin Luani i Artë për vepër jetësore në edicionin e sivjetmë të Festivalit të Filmit në Venecia.
Festivali i Venecias është një prej më të rëndësishmëve në botë dhe edicioni i 74 me radhë do të zhvillohet nga 30 gushti deri më 9 shtator.
“Pak yje hollivudiane kanë demonstruar vendosmëri të tillë dhe guxim gjatë karrierës së tyre profesionale siç ka bërë Jane Fonda”, është shprehur drejtori i festivalit, Alberto Barbera.
Duke folur për Redfordin, ai ka thënë: “Pa marrë parasysh nëse është pas kamerës, angazhohet për ndonjë film të pavarur apo për të mirën e planetit tonë, Robert Redford na ka udhëhequr për rreth pesë dekada me anë të krijimit të filmave të shkëlqyer dhe duke qenë një aktivist që e ka kombinuar fuqinë, inteligjencën dhe famën”.
Fonda dhe Redford kanë luajtur bashkë në filmat “The Chase” (1966), “Barefoot in the Park” (1967) dhe “The Electric Horseman” (1979).
Dyshja legjendare ka punuar bashkë edhe në filmin origjinal të Netflix, “Our Souls at Night”. /Telegrafi/