Teksa vazhdonte lufta në Kosovë dhe dhjetëra-mijëra shtëpi shqiptarësh ishin rrënuar për toke, e qindra-mijëra shqiptarë kërkonin strehë ku të mundnin – në Kosovë e jashtë saj – pushteti serb ndërmerr një aksion në Prishtinë.
Në tokën e Universitetit të Prishtinës, më 27 janar 1999 vihet kryqi i madh në maje të kishës politike, të quajtur “Krishti Shpëtimtar”, si pjesë e fushatës dhe mitit serb se Kosova është tokë e Serbisë.
Kjo kishë mbeti e papërfunduar, pasi po të njëjtin vit çlirohet Kosova.
Ajo këto ditë rikthehet në temë diskutimi, pasi disa priftërinj pastruan ambientin rreth kishës dhe filluan ta lyenin pjesën e brendshme të saj, gjë e cila u ndalua nga organet komunale. Përkitazi me këtë, zëvendëskryeministri Branimir Stojanoviq, në mbledhjen e sotme të Qeverisë tha se “Komuna e Prishtinës i ka kërcënuar serbët e Kosovës duket i ndaluar punimet për pastrimin e Kishës Ortodokse”. Ndërkaq, kryetari i Prishtinës, Shpend Ahmeti, iu kundërpërgjigj atij duke thënë se Komuna duhet ta zbatojë ligjin për ndërtim dhe se kjo kishë nuk ka leje. /Telegrafi/
