Arianit Jakupi. i cili është zgjedhur kryetar i Odës së Farmacistëve të Kosovës, ka thënë se farmacistët po përballen me disa probleme, e ndër më të theksuarat është çmimi i barnave.
Kryetari i Odës së Farmacistëve të Kosovës, në një intervistë për emisionin “Shëndeti” në RTV Dukagjini, ka thënë se do të bëhet nivelizimi i çmimeve të barnave për barnat që rimbursohen.
“Ministria e Shëndetësisë është duke përgatitur një udhëzim administrativ për çmimet e barnave. Do të bëhet përcaktimi i çmimit për barnat e rimbursuara”, thotë Jakupi, i cili shprehet se ky do të jetë lehtësim për farmacistët pasi më nuk do të merren me çmimet por me kualitetin e shërbimit.
Sipas tij, një kthesë e rëndësishme ne sektorin e farmacisë në Kosovë do të jetë edhe fillimi i sigurimeve shëndetësore, përcjell Telegrafi.
I pari i farmacistëve të Kosovës ka folur edhe problemin e dhënies së barnave pa recetë.
“Ka një udhëzim administrativ, për dhënien e barnave me recetë. Por zbatimi në praktikë nuk ka ndodhur. Por me miratimin e ligjit për rimbursim, barnat pa recetë nuk do të rimbursohen, dhe me ligjin e sigurimeve kjo do të jetë obligative e jo ne vullnetin e mjekëve”, ka thënë Jakupi./Telegrafi/
