Jake Paul nuk është më objekt talljeje: Fiton me nokaut brutal në raundin e parë ndaj një boksier profesionist

Youtuberi i famshëm, Jake Paul ua mbylli gojën kritikëve dhe për herë të parë në karrierën e tij mundi një boksier profesionist me një nokaut spektakolar në raundin e parë.

26-vjeçari amerikan fitoi për të tetën herë në karrierën e tij, por për herë të parë ndaj një boksieri profesionist.

Kujtojmë se Paul fitoi famë botërore duke regjistruar video në Youtube dhe në vitin 2020 vendosi të bëhej boksier.

Fillimisht ai u ndesh me Youtuberë të tjerë dhe shumë e tallnin për këtë, ndaj vendosi të luftojë kundër emrave më seriozë.

Lexo po ashtu Tommy Fury mposht Jake Paulin, pavarësisht se u rrëzua nga YouTuberi

Ai mundi ish-luftëtarët e MMA, Tyron Woodley, Ben Askren dhe Anderson Silva, por ishte ende objekt talljeje dhe vendosi të hyjë në ring me një boksier profesionist për herë të parë.

Vëllai i Tyson Fury, Tommy Fury e mundi atë me vendim të ndarë, por kjo disfatë nuk e dekurajoi atë. Në gusht, ai mundi Nate Diaz, një tjetër legjendë e MMA-së dhe mbrëmë ai doli në ring kundër boksierit profesionist amerikan Andre Augusto (35 vjeç, me rekord 10-1-1).

Paul e mundi atë në Orlando pas vetëm dy minuta e 32 sekonda luftë. Ai e dërgoi atë në dysheme me një ‘uppercut’ të fuqishëm me të djathtën dhe ky ishte fundi i luftës.

Jake Paul me këtë fitore u ngjit në vendin e 131-të në listën e BoxRec për luftëtarët më të mirë në kategorinë cruiserweight dhe është e sigurt se me këtë fitore ai dëshmoi se nuk është thjesht një cirk i zakonshëm, por se vërtet ka diçka për të në botën e boksit profesionist. /Telegrafi/