Silent 80 është jahti luksoz që furnizohet në tërësi nga panelet diellore, duke ia mundësuar pronarit që të udhëtojë për një kohë të gjatë, pa pasur nevojë të kthehet për ta rimbushur.
Lundrimi zhvillohet në qetësi maksimale, me ndihmën e baterive të fuqishme të prodhuara nga kompania Tesla, transmeton Telegrafi.
Megjithëse kushton katër milionë funte, do t’ia mundësonte ndonjë milioneri që është dashamir i natyrës, jo vetëm të lundrojë i qetë, por edhe të mbrojë ambientin nga emetimi i gazrave. Bashkë me dhjetë mysafirë, që mund të akomodohen në pesë kabina.
Nëpërmjet 70 paneleve që mbledhin energji nga dielli, furnizohet qarkullimi i jahtit të gjatë 25 metra, duke i kursyer pronarit shumë para në blerjen e derivateve.
Mungesa e rezervuarit për lëndë të djegshme, ka edhe një përparësi, pasi lë hapësirë për ndonjë makinë amfibe për ujë dhe tokë, apo ndonjë nëndetëse të vogël.
Dizajnerët pretendojnë se Silent 80 është shumë ekonomik dhe i pavarur, megjithëse nevojitet rikthimi në breg për furnizim me ushqim dhe pije.
Sistemi tërësisht elektrik, i mundëson të lëvizë me shpejtësi të konsiderueshme, gjithnjë në qetësi të plotë. /Telegrafi/
