Policia e Himarës ka gjetur dhe arrestuar drejtuesin e skafit që dyshohet se ka aksidentuar rëndë pushuesin rus dje në plazhin midis Himarës dhe Livadhit.
Sipas policisë ai është Fatmir Kuçi, 44 vjeç banues në Elbasan. Sipas një njoftimi për mediat, Policia thotë se Kuçi ka aksidentuar nga pakujdesia shtetasin rus dje në orën 11, duke i prerë edhe një gjymtyrë. Kuçi drejtonte një skaf me mbishkrimin “Black Arroë” dhe ka përplasur shtetasin rus D.K.
Njoftimi i policisë
Policia ka arrestuar në flagrancë për “Vrasje nga pakujdesia”, shtetasin: · Fatmir Kuçi, 44 vjeç, banues në Elbasan. Shërbimet e Policisë kanë bërë arrestimin e Fatmir Kuçi-t, pasi ditën e djeshme rreth orës 11:00 në zonën bregdetare të quajtur “Livadh” i Himarës, ky shtetas duke drejtuar mjetin lundrues tip skaf-plastik me mbishkrimin “Black Arroë”, dyshohet se ka dëmtuar aksidentalisht shtetasin Rus D.K., i cili ka gjetur vdekjen për shkak të plagëve të marra, në spitalin e Himarës.
Policia ka sekuestruar dhe konfiskuar 2 mjete lundruese në përdorim dhe në pronësi të Kuçi-t : – mjetin lundrues skaf-plastik me mbishkrimin “Black Arroë”, 11.73 m i gjatë dhe 3.20 m i gjërë, me 3 motorë – 275 KF secili. – mjeti lundrues motor-deti me emrin “Viktoria-3”, pa dokumentacion përkatës.