Site icon Telegrafi

Izraeli liroi palestinezin që më së gjati qëndroi në burgjet izraelite

Nol Elshani

Karim Younes arriti të enjten në vendlindjen e tij, Ara, pasi kaloi 40 vjet të jetës në burgjet izraelite.

Ai ka kaluar më së shumti kohë pas hekurave se çdo i burgosur tjetër palestinez.

“Kanë kaluar 40 vjet dhe unë do të sakrifikoja po aq të tjera për lirinë e popullit tim”, tha 63-vjeçari pas lirimit.

Në vitin 1983, një gjykatë izraelite e dënoi me burgim të përjetshëm 23-vjeçarin e atëhershëm Karim Younes për vrasjen e Avraham Bromberg në vitin 1980, një ushtar izraelit. Ai u dënua gjithashtu për anëtarësim në lëvizjen e atëhershme të ndaluar, Fatah dhe armëmbajtje pa leje.

Dënimi i përjetshëm më pas u ndryshua në 40 vjet. Në vitin 2017, presidenti palestinez, Mahmoud Abbas zgjodhi Karim Younes si anëtar të Komitetit Qendror të Fatahut.

Ministri izraelit i Sigurisë, Itamar Ben Gvir i ndaloi palestinezët të festonin lirimin e Younes. Përveç kësaj, Aryeh Deri, ministri i Brendshëm i Izraelit, po shqyrton mundësinë e heqjes së shtetësisë izraelite të Younesit, duke sugjeruar se ai mund të dëbohet.

Forcat izraelite transportuan Karim Younis nga burgu Hadarim në qytetin e Ra’anana, rreth 57 kilometra larg shtëpisë së tij në Ara. Në Ra’anana, Younes u la në stacionin e autobusëve pa mundur të telefononte të afërmit e tij.

Ndalesa e parë e Karimit në Ara ishin varrezat ku janë varrosur prindërit e tij.

Heqja e shtetësisë izraelite për ish-të burgosurin ka një bazë ligjore, sipas ekspertit ligjor, Sawsan Zaher.

Në vitin 2008, parlamenti izraelit, Knesseti amendamentoi ligjin e shtetësisë duke i dhënë kompetenca ministrit të Brendshëm t’ia heqë shtetësinë personave të dënuar për vepra terroriste.

Megjithatë, mund të ketë vështirësi në raport me Younes, pasi ai nuk ka shtetësi tjetër pos asaj izraelite. /Telegrafi/

Exit mobile version