Ju prezantojmë me Ivan Balliun, mbrojtësin me origjinë shqiptare lindur në Katalonjë, i cili ëndërron të bëhet pjesë e Kombëtares kuqezi në të ardhmen e afërt.
Ivani ka lindur më 1 janar 1992 në Kaldes de Malaveja, provincë e Katalonjës, nga baba shqiptar dhe nënë spanjolle me mbiemër Kampeni.
Në një intervistë për “Transfermarkt.de”, 24-vjeçari thotë se nuk di shumë rreth origjinës së tij.
“Nuk di shumë, di vetëm që paraardhësit e mi erdhën në Spanjë. Im atë është përpjekur të gjejë regjistrin e familjes, por unë nuk kam shumë informacion”, thotë futbollisti që aktivizohet me Metzin në Ligën 1 franceze.
Balliu luan si mbrojtës i majtë, por mund të bëjë mirë edhe në krahun tjetër të prapavijës. Ai mund të jetë një alternativë e çmuar për Kombëtaren e Shqipërisë, për të cilën thotë se e ka ëndërr ta përfaqësojë. Madje ai pranon se është në bisedime me FSHF-në që kjo të realizohet sa më shpejt.
“Agjenti im është në kontakte me Federatën Shqiptare të Futbollit për të gjetur një zgjidhje. Mendoj se i kam dëshmuar cilësitë në karrierën time dhe dua të bëj të njëjtën gjë edhe me ekipin kombëtar”, deklaron lojtari.
Ai tregon se e ndoqi ndeshjen e 9 tetorit mes Shqipërisë dhe Spanjës dhe e vlerëson ekipin kuqezi. “E pashë ndeshjen kundër Spanjës. Mendoj se Shqipëria ka një ekip të mirë, që luan futboll të rrezikshëm në kundërsulm. Nuk bëra tifo për asnjërën skuadër, pasi thjesht e shijova ndeshjen”, pohon mbrojtësi.
Në verën e 2013-s futbollisti që ka luajtur tri ndeshje me Spanjën U-16 (ka shënuar një gol) dhe po kaq me atë U-17, vendosi të lërë Katalonjën në kërkim të një aventure të re. Ai iu bashkua Aroukas, ekip i ligës së parë portugeze, ku luajti për dy sezone. Aty Balliu fitoi menjëherë vendin e titullarit dhe luajt rregullisht për dy sezonet që pasuan.
Në korrik të vitit 2015, Ivani vendosi të ndryshojë sërish mjedis. Destinacioni i radhës ishte Metzi, që asokohe luante në Ligën 2 të Francës.
Falë një sezoni të shkëlqyer skuadra u ngjit në nivelin elitar dhe aktualisht renditet në vendin e 11-të. Pas një fillimi të vështirë të sezonit për shkak të një dëmtimi, Balliu tani e ka fituar vendin e titullarit dhe në gjashtë ndeshje që është aktivizuar (pesë me minutazh të plotë), ka dhenë një asist.
