Site icon Telegrafi

Italia tregon pse është kampioni në fuqi i Evropës, fiton në udhëtim te Hungaria dhe shkon në ‘Play-Off’ të Ligës së Kombeve

Romak Zeqiri

Atëherë kur i nevojitet fitorja më së shumti, atëherë e arrijnë.

Italia ka treguar forcën e kampionit në fuqi të Evropës duke fituar në udhëtim te Hungaria me rezultat të pastër 0-2.

Kampionët në fuqi të Evropës e nisën më mirë ndeshjen duke sulmuar, ku krijuan raste të mira me Raspadorin e Gnonton, por pa sukses.

E goli i parë në ndeshje erdhi në minutën e 27-të, kur Giacomo Raspadori arriti të përfitoj nga një gabim skandaloz i vendasve dhe dërgoi topin në rrjetë për 0-1.

Italianët shkuan në pushim mes pjesëve me epërsi minimal 0-1.

Mysafirët e nisën edhe më mirë pjesën e dytë, kur në minutën e 52-të shënuan edhe golin e dytë në këtë sfidë.

Bryan Cristante dhuroi një asistim fantastik për Federico Dimarco i cili nga afërsia shënoi për ta dyfishuar epërsinë e italianëve.

Vendasit krijuan disa raste të mira shënimi, por portieri italian Donnarumma ishte në top formë duke bërë pritje të jashtëzakonshme në disa raste.

Deri në fund të ndeshjes, Italia u mbrojt mirë dhe mori një fitore të madhe nga udhëtimi në Budapest, duke e mposhtur për herë të dytë Hungarinë në grup.

Kësisoj Italia përfundon si lider në Grupin 3 të Ligës A në Ligën e Kombeve dhe do të luaj në ‘Final-Four’.

‘Azzurët’ e mbyllën grupin me 11 pikë pas gjashtë ndeshjeve duke lënë në vend të dytë Hungarinë me 10 pikë, derisa në vendin e tretë është Gjermania me shtatë dhe në të fundit anglezët me vetëm tri pikë. /Telegrafi/

Exit mobile version