Ka qenë një ditë e ngarkuar për presidentin e FIFA-s, Gianni Infantino, në Firence, nga ku e hodhi poshtë mundësinë që Italia të shkonte në Kampionatin Botëror.
Është raportuar se Azzurrët mund të merrnin një biletë për ‘Katar 2022’ në muajin nëntor, pasi FIFA e ka sanksionuar Iranin që i ka lënë 2.000 femra jashtë stadiumit në ndeshjen kualifikuese kundër Libanit.
Megjithatë, shpresat e italianëve nuk zgjatën shumë, sepse fillimisht kjo u përgënjeshtrua nga anëtarja ekzekutive e FIFA-s, Evelina Christillin dhe tash nga kreu i organizatës.
I pyetur nga gazetarët nëse Italia ka një shans për ta zëvendësuar Iranin në Katar, Infantino është përgjigjur: ‘Të jemi serioz, ju lutem…”.
Presidenti i FIFA-s ka thënë se ndihet i pikëlluar që Azzurrët do të mungojnë në Botërorin e dytë radhazi, ndërsa ka shtuar se në të ardhmen ekziston mundësia që Kampionati Botëror të mbahet çdo dy vite. /Telegrafi/