Një veteriner i Sidneit po lutet për ndalimin e racave të qenve vrasës pasi dy gra u copëtuan nga një pitbull gjigant amerikan, që thuhet se është madhësia e një “kali të vogël”.
Sipas mediave të huaja, përcjell Telegrafi, fqinjët e dëshpëruar rrahën qenin e egër me një shufër hekuri dhe e goditën me thikë për të ndaluar sulmin e tërbuar ndaj pronares së tij femër në një shtëpi rurale në jug të Sidneit.
Pronarja 54-vjeçare e qenit u gjet me plagë të rënda të kafshimit kur ekipet e ambulancës mbërritën në shtëpinë e saj në Pheasants Nest në rajonin Macarthur të premten në mëngjes.
Vajza e gruas dhe dy fqinjët nxituan për të ndihmuar gruan që ishte shqyer nga qeni, por qeni më pas iu kthye atyre, duke e sulmuar gruan e dytë dhe një burrë që përpiqej t’i shpëtonte.
Shërbimet e urgjencës gjetën dy gra të plagosura rëndë në shtëpi, ndërsa burri shpëtoi me lëndime të lehta.
“Është një qen kaq i madh”, ka thënë fqinji Rosel Szumski për Daily Mail Australia. “Ata nuk duhet ta kishin atë qen fare”.
Sulmi të premten vjen vetëm dy muaj pas një sulmi vdekjeprurës në Central Coast në korrik kur një foshnjë pesë javëshe u sulmua për vdekje nga një pitbull tjetër. /Telegrafi/