Trupat e pajetë të Joseph Orbes 21-vjeç dhe Rakel Ngujen, 20, që ishin zhdukur në korrik të këtij viti në parkun nacional të Kalifornisë, Joshua Tree, janë gjetur këto ditë, kurse policia beson se bëhet fjalë se ekzistojnë dy versione – vrasje dhe vetëvrasje.
Trupat e të rinjve janë gjetur më 15 tetor në një pozicion që ngjante me përqafimin. Ndërkaq policia ka njoftuar se provat e deritanishme që janë gjetur, qojnë në idenë se Joseph kishte vrarë Rakelën, dhe më pas kishte kryer vetëvrasje.
Gjithashtu raportohet se dyshja kishin mbetur pa ujë e ushqim në momentet më kritike, transmeton Telegrafi.
Zëdhënësja e zyrës së sherifit në San Bernardino, Cindy Bachman, ka deklaruar se dyshja janë gjetur nën një dru dhe dukej se ata ishin përqafuar në momentet e fundit të jetës.
“Diçka të tillë kurrë më parë nuk kemi parë, të përqafuar dhe dukeshin të dashuruar marrëzisht në njëri-tjetrin”, ka shtuar ajo
Ajo gjithashtu ka pranuar se dyshja ishin veshur me rroba të verës për shkak të temperaturave të larta, ndërsa policia ka gjetur në vendin e ngjarjes një revole të regjistruar në emrin e Orbesit.
Zhdukja e dyshes ishte raportuar në polici më 28 korrik, dhe menjëherë ishin angazhuar ekipe për kërkimin e tyre.
Por renxherët e parkut nacional fillimisht kishin gjetur veturën e tyre dhe më pas kanë hasur në gjurmë që u ka ndihmuar në gjetjen e trupave të tyre. Ekipet e shpëtimit i kanë kaluar më shumë se 2100 orë duke kërkuar çiftin, të cilët i gjetën të vdekur.
Por në zyrën e sherifit të San Bernardinos, gjithashtu kanë bërë të ditur se kanë angazhuar inspektorë dhe hetues të zotë, për shkak të “rrethanave të dyshimta dhe lëndimeve në trupat e viktimave”. /Telegrafi/
