Ish-drejtori i policisë së Shkodrës Edmond Sulaj paditi për shpifje deputetin Gazment Bardhi. Shorti i hedhur sot ka përcaktuar gjyqtaren Flojera Davidhi për të shyqrtuar padinë.
Objekti i padisë është ‘fyerja botërisht, në dëm të disa personave, ose më shumë se një herë’.
Dy muaj më parë gjatë një fjale të mbajtur në Kuvend, Bardhi akuzoi qeverinë se në krye të Drejtorisë së Policisë së Shkodrës, drejtorin e kanë emëruar bandat kriminale.
Në mbështetje të akuzave të tij Bardhi lexoi në Kuvend dhe përgjimet e aplikacionit SKY ECC, ku një prej eksponentëve më të rëndësishëm të krimit në Shkodër sipas tij, emëron drejtorin e ri të policisë.
“Si ta quajnë Drejtorin e Policisë së Shkodrës, e di emrin e Drejtorit të Policisë? Ta them unë kush ta ka emëruar!
Kodi pin i Sky ECC “DGLXJM”: O vlla ka llafe për atë mikun tënd ministër të Brendshëm, di gjë ti?
Përgjigjet kodi Sky ECC “7142D9”: Po por kam frikë se nuk e bën
Ndërhyn prapë kodi “DGLXJM”: Mua Mondi më duhet një dimër aty vlla!
Mondi në fakt është drejtori aktual i policisë vendore në Shkodër që u emërua vetëm 1 muaj pasi ky miku i eksponentit në fjalë që është përfaqësues i një prej bandave më të rrezikshme në vend, u bë ministër i Brendshëm”, tha Bardhi asokohe.