Greta Thunberg, 16-vjeçarja aktiviste suedeze e klimës, mahniti botën kur u bëri thirrje udhëheqësve botërorë për apatinë e ndryshimit të klimës në OKB të hënën.
Megjithatë, pak orë pas fjalimit të saj, përcjell Telegrafi, presidenti Donald Trump duket se po përpiqej të ironizonte me Thunberg, kur ai bëri një postim në Twitter.
“Ajo duket si një vajzë e re shumë e lumtur që pret një të ardhme të ndritshme dhe të mrekullueshme”, shkroi ai në një cicërimë vonë në mbrëmje. “Diçka e bukur për tu parë!”.
Dhe ndërsa nuk iu drejtua drejtpërdrejt në cicërimin e Trump, Thunberg pati një përgjigje të qetë por të shkathët ndaj tij, kur ajo azhurnoi përshkrimin e saj në Twitter me të njëjtat fjalë dhe formulimin e dhënë nga presidenti Trump.
“Një vajzë e re shumë e lumtur që pret një të ardhme të ndritshme dhe të mrekullueshme”, shkroi ajo në përshkrimin e profilit të saj në Twitter, në të cilin sipas “Time” shkruante: “Aktiviste 16 vjeçare klimaterike me Asperger. Bashkohuni në grevat globale të klimës më 20-27 Shtator! #FridaysForFuture”.
Ndryshe, gjatë fjalimit të saj emocional në OKB, Thunberg dënoi udhëheqësit e botës për të mos ndërmarrë më shumë veprime kur është fjala për ndryshimet klimatike.
“Unë nuk do të duhej të isha këtu. Unë duhet të kthehem në shkollë në anën tjetër të oqeanit”, tha ajo. “… Ju keni vjedhur ëndrrat e mia dhe fëmijërinë time me fjalët tuaja boshe”. /Telegrafi/