Simone Inzaghi ka thënë se nuk është bërë pishman për rotacionet që ka bërë në barazimin 1-1 ndaj Monzës këtë mbrëmje.
Në letër, kjo parashihej që të ishte një sfidë e lehtë për ‘Nerazzurrët’ para një jave të ngarkuar ku do të udhëtojnë në Angli për duelin ndaj Manchester Cityt në Ligën e Kampionëve dhe më pas ndaj rivalëve lokalë Milanit vikendin e ardhshëm.
“20 minutat e parë ishin mjaft të mirë, ne krijuam shumë raste dhe duhet ta kishim zhbllokuar rezultatin atëherë. Ishte e ngjashme si sezonin e kaluar, por ne atëherë morëm herët avantazhin por nuk e bëmë këtë herë”, ka thënë Inzaghi fillimisht.
“Pas kësaj, ne ishim të ngadaltë me topin, nuk kishim mjaftueshëm kualitet në pasimin e fundit dhe ndoshta duhet të kishim tentuar më shumë goditje dhe jo të shkojmë për asistimin”.
“Monza u mbrojt thellë, ne duhet të kishim bërë më mirë në drejtimin tonë. Jemi të zhgënjyer, por shikojmë përpara”.
“Frattesi dhe Asllani kanë bërë atë që iu është kërkuar, ekipi ka luajtur ashtu siç deshëm dhe ndoshta e kemi merituar fitoren, por Monza punoi shumë dhe u mbyllën mirë në mbrojtje”, përfundoi italiani.
Ky rezultat bëri që Interi të zbresë një pozitë më poshtë në tabelë dhe tashmë mban vendin e dytë me pikë të barabarta me Juventusin.
Napoli tashmë është bërë lideri i ri i kampionatit italian me nëntë pikë të grumbulluara pas katër ndeshjeve të luajtura./Telegrafi/