Të premten Komuna e Pejës është furnizuar me rreth 950 vaksina të reja, mirëpo tollovia e krijuar në Prishtinë kishte shtyrë procesin e vaksinimit në këtë komunë.
Drejtori i Shëndetësisë në Komunën e Pejës, Petrit Loci, ka thënë për RTV Dukagjinin se ky proces ka rifilluar sot dhe gjithçka deri më tani ka shkuar mirë.
“Gjatë ditës së sotme janë vaksinuar rreth 130 persona. Vaksinimi është duke u bërë me plan. Ata që kanë aplikuar online apo që janë paraqitur më herët në qendrat e vaksinimit ftohen me orë dhe minuta të saktë për të mos krijuar radhë dhe tollovi”, ka deklaruar Loci, përcjell Telegrafi.
Loci thotë se për të mos rrezikuar shëndetin e qytetarëve janë të gatshëm ta ftojnë edhe Policisë së Kosovës për të mbajtur rend.
“Ne marrim çdo ditë lista të azhurnuara nga Ministria e Shëndetësisë dhe jemi të obliguar të zbatojmë ato lista. Nëse ka hapësirë mund të vazhdojmë me vaksinimin e personave tjerë”.
Drejtori i Shëndetësisë në Komunën e Pejës ka thënë se për dallim nga herët e kaluara kësaj radhe kërkesa për vaksinim është shumë e madhe.
Loci thotë se po administrojnë dozat që kanë në dispozicion por do të kërkojnë edhe tjera nga niveli qendrore.
Ai thotë se planifikojnë të hapin edhe një tjetër qendër vaksinimi në Pejë përkatësisht në lagjen “Haxhi Zeka” në Tophane./Telegrafi/