Udhëheqësit e qeverive të Ballkanit Perëndimor do të bëjnë përpjekjen e radhës për të çuar përpara iniciativën e Mini-Shengenit Ballkanit. Ftesës së kryeministrit të Maqedonisë Zoran Zaev, iu kanë përgjigjur pozitivisht kryeministri i Shqipërisë Edi Rama, dhe Presidenti Serb, Aleksandar Vuçiq, ndërsa janë në pritje të një përgjigjeje prej homologut nga Kosova Avdullah Hoti.
Kosova ende nuk e konfirmuar pjesëmarrjen ne takimin online me vendet e rajonit, për të diskutuar rreth çështjes se Mini-Shengenit ballkanik.
Për njohësin e çështjeve politike Demush Shasha, kjo iniciativë në të kaluarën, jo vetëm në Kosovë, por nuk ka gëzuar përkrahje as në politikat e nivelit të lartë të Bashkimit Evropian.
“Pengesën e parë që e shih në këtë proces është mungesa e mbështetjes nga ana e Bashkimit Evropian. Në aspektin e brendshëm iniciativa e Mini-Schengenit Ballkanik nuk gëzon mbështetjen e gjithë subjekteve të spektrit politik”, deklaroi për RTV dukagjinin, Demush Shasha.
Shasha e cilëson jo serioze këtë iniciativë për Mini-Shengenin Ballkanik, përcjell Telegrafi.
“Më shumë po shihet si një fizkulturë politike, se sa një iniciativë serioze për avancimin e bashkëpunimit rajonal. E them këtë pasi që gjitha synimet që i ka kjo iniciativë janë duplifikim i plotë i Procesit të Berlinit”, deklaroi më tej Demush Shasha.
Me marrëveshjen e 4 shtatorit në Uashington, Kosova ishte zotuar se do të jetë pjesëmarrëse në kuadër të bashkëpunimit rajonal, i njohur si Mini-Shengeni Ballkanik. Por, përkundër insistimit të TV Dukagjini, si nga Zyra e Kryeministrit ashtu edhe nga Ministria e Jashtme, nuk kanë konfirmuar pjesëmarrjen e Hotit në këtë takim virtual. /RTV Dukagjini/Telegrafi/