Prodhimi industrial gjerman u rrit ndjeshëm mbi pritshmëritë gjatë muajit Prill, tregojnë të dhënat e fundit të publikuara nga Ministria gjermane e Ekonomisë.
Shifrat sinjalizojnë se motori i ekonomisë më të madhe të Europës po punon me kapacitet të kënaqshëm gjatë tremujorit të dytë të vitit. Pas dy muajsh me radhë në rënie, shifra pozitive e muajit Prill tregon se, firmat gjermane nuk janë të shqetësuara nga ngadalësimi i ekonomisë globale, apo kriza e lëndëve të para.
Prodhimi u rrit kështu me 0.8 për qind gjatë muajit Prill, ndërkohë që pritshmëritë flisnin për një rritje pranë 0.7 për qind. Edhe shifrat e muajit Mars u rishikuan në territor pozitiv, në një rënie prej 1.1 për qind nga 1.3 për qind që vlerësohej paraprakisht.
“Prodhimi industrial e ka nisur me këmbën e mbarë tremujorin e dytë të vitit”, nënvizon Ministria e Ekonomisë. Trendi pozitiv udhëhiqet nga manifaktura dhe sektori energjetik.
Këto sektorë kanë zhbërë kështu performancën tepër zhgënjyese të sektorit të ndërtimit, ku prodhimi regjistrohet në një rënie prej 1.7 për qind gjatë së njëjtës periudhë kohore. “Besimi dhe morali në firmat që operojnë në sektorin industrial është përmirësuar ndjeshëm gjatë muajve të fundit”, nënvizon Ministria e Ekonomisë.
Pavarësisht këtyre të dhënave, ekonomistët projektojnë një ngadalësim të hapit të rritjes ekonomike gjatë tremujorit të dytë të vitit. /Telegrafi/