Ciro Immobile e ka bërë të qartë se Lazio do të udhëtojë te Interi në fundjavë me qëllimin për të fituar dhe do të sigurohet që të përfshihet në top-katërshe deri në fund të sezonit.
Fitorja ndaj Cagliarit (1-0) ishte e gjashta radhazi në Serie A dhe në këtë mënyrë, Biancocelestët janë barazuar me pikë me Romën (që ndodhet në vend të katërt në tabelë).
Kundërshtari i ardhshëm i Lazios është Interi që ndodhet në vend të dytë, ndërsa në mesjavë Nerazzurrët zhvillojnë edhe ndeshjen kthyese gjysmëfinale të Kupës së Italisë kundër Juventusit.
“Është një ndeshje shumë e rëndësishme, ata po luajnë mirë dhe i dimë vështirësitë e asaj përballjeje, mirëpo kemi një javë që të përgatitemi dhe të shkojmë në Milano me qëllimin për të fituar”, ka deklaruar Immobile për Sky Sport Italia.
Që nga fillimi i vitit 2021, Lazio ka grumbulluar 19 pikë, vetëm Manchester City dhe Monaco kanë fituar më shumë pikë se skuadra italiane nga top-pesë ligat evropiane. /Telegrafi/