Imami nga Peja, Drilon Gashi, ka kërkuar nga imamët e xhamive që ajetet kuranore të lexohen në gjuhën shqipe.
Gashi, përmes një postimi në Facebook, ka thënë se leximi i ajeteve kuranore është më mirë të lexohen në shqip, sesa në arabisht.
Kjo për arsye se shumica dërmuese nuk e kuptojnë gjuhën arabe.
Postimi i plotë i imamit Gashi:
“Është bërë traditë në disa xhami të vendit tonë që gjatë Ramazanit të bëhet “khatme” i gjithë Kurani. Shumë imamë nëpër xhamitë tona, çdo ditë e lexojnë nga një “xhuz” (1/30 pjesë e Kuranit) para namazit të sabahut, pas tij ose para drekes, në gjuhën arabe. Mirëpo, shumica dërrmuese e atyre që dëgjojnë, nuk po kuptojnë asgjë prej recitimit!
Kurani i Shenjtë ka zbritur që të meditohen ajetet e tij dhe të punohet me të, prandaj mendoj unë, ma sevap është tua lexojnë xhematit në gjuhën shqipe, sesa arabisht.
Studimi, soditja dhe përsiatja rreth një kaptine të vetme të Kuranit, është më e lëvdueshme të Zotit sesa recitimi i tërë kuranit pa vëmendje gjithashtu”, ka shkruar imami Gashi. /Telegrafi/
