Ka muaj të tërë që QKUK-së i mungon njëri nga ilaçet për trajtimin e sëmundjeve të kancerit, raporton KTV.
Rreth 40 pacientë që nga nëntori i vitit të kaluar këtë bari e blejnë vetë. Mungesa e tij ka rritur edhe çmimin.
Një pacient i ka dëshmuar KTV-së se e ka blerë një pako me 30 hapa 1 mijë euro. Por, ky ilaç mban banderolën e kuqe, e që nënkupton se është marrë në QKUK. KTV ka kontaktuar me institucionet gjegjëse për të kuptuar se si është shitur ilaçi që duhet të shpërndahet falas në QKUK, por askush për këtë çështje nuk ka pranuar të flasë para kamerës.
Drejtori i Klinikës së Onkologjisë, Ekrem Hyseni, nuk ka dashur të komentojë lidhur me rastin, përderisa ka theksuar se sistemi i menaxhimit në këtë klinikë është strikt. E vetmja mundësi, sipas tij, është që ilaçi është keqpërdorur nga ndonjë familjar i pacientëve.
Ndërsa Barnatorja Qendrore në QKUK, nëpërmes një përgjigje me email vetëm ka sqaruar procedurat se si distribuohen kërkesat për citostatikë nëpër klinika.
Ministria e Shëndetësisë ka bërë të ditur se për këtë ilaç tashmë është shpallur fitues kompania “KRKA” me çmimin prej 114.000 mijë eurove.