Federata Botërore e Atletikës (IAAF) do të finalizojë në qershor kriteret për përdorim të gjymtyrëve artificiale nga atletët që dëshirojnë të garojnë në Lojërat Olimpike me persona me aftësi të plota, raporton Reuters.
IAAF-i të enjten ka thënë se po krijon një grup punues për të rishqyrtuar rregullin 114.3 që thotë se atletët që përdorin ndihmë mekanike nuk mund të garojnë në gara të mëdha nëse nuk dëshmojnë se pajisja ndihmëse nuk do t’u japë atyre avantazh jokorrekt garues, përcjell sot Koha Ditore.
Formimi i grupit është nxitur nga kampioni i Gjermanisë në kërcim së gjati nga viti 2014, Markus Rehm, që është duke tentuar të bëhet sportisti i dytë me protezë që merr pjesë në Lojërat Olimpike, pasi jugafrikani Oscar Pistorius kishte garuar në Lojërat Olimpike “Londra 2012” në vrapim në 400 metra.
Rehm, që njihet si “Kërcyesi me shpatë”, për shkak se përdor një protezë nga fibrat e karbonit, po ashtu garon në gara me atletë me aftësi të plota.