Ish-drejtori i Klinikës së Onkologjisë Dr. Ekrem Hyseni, kandidat për deputet nga LDK-ja, ka thënë se lista e barneve esenciale në Kosovë është më e varfëra në rajon.
Hyseni, në “Debat Plus” me Ermal Pandurin në RTV Dukagjini, ka thënë se pa sistem të informimit shëndetësorë nuk mund të ketë sistem të sigurimeve shëndetësore.
Ai ka thënë se fondi i sigurimeve shëndetësore është shumë kompleks dhe nuk mund të implementohet vetëm nga një qeveri apo një mandatë, përcjell Telegrafi.
“Është shumë me rëndësi të shtohen shërbimet shëndetësore dhe besueshmëri në këto shërbime. Çka e matë besueshmërinë? Është shumë e thjeshtë. Ne kemi shumë shërbime që ofrohen në institucione publike të shëndetësisë e nga ana tjetër kemi shumë pacientë që ikin për shërim jashtë vendit për të njëjtat shërbime”, tha ai.
Zyrtari i LDK-së duke folur për çmimet e barnave ka thënë se shumë produkte janë liruar pasi iu ka skaduar patenta.
“Kjo do të ndodhë edhe në të ardhmen. Produktet e patentuara zakonisht e kanë çmimin dhjetëfish më shtrenjtë se sa në momentin kur iu skadon patenta. Tregu barnave ka nevojë për t’u rregulluar, por edhe konkurrenca e bën të vetën”, tha ndër të tjera Hyseni.
Hyseni ka thënë se Ministri i Shëndetësisë mund të merret me çështje konkrete siç është largimi i pagesës për parkingun në QKUK./Telegrafi/