Elseid Hysaj po zhvillon një sezon të dytë fantastik te Napoli, por i rrethuar edhe nga lajmet për largimin e tij dhe ofertat e klubeve të mëdha evropiane.
Pas asaj që mbrojtësi shkodran ka dhënë në fushën e lojës padyshim që në afatin kalimtar të verës pritet të ketë oferta në drejtim të tij, por nuk dihet se çfarë do të ndodhë më pas.
Është menaxheri i Hysajt, Mario Giufredi ai që zbulon një detaj nga marrëdhënia e lojtarin me klubin ku ai është aktualisht.
Sipas agjentit të mbrojtësit, Hysaj është i dashuruar me Napolin dhe se mund të mos largohet kurrë nga aty.
Kjo deklaratë është dhënë për radion “Kiss Kiss” në Napoli, ku Mario Xhufredi është shprehur.
“Hysaj është në dashuri në Napolin, është i lumtur në Napoli dhe mund të mos largohet kurrë”.
“Qyteti e ka pritur shumë mirë dhe ai ndihet si një qytetar i Napolit. Nuk është rastësi që shpesh thonë se napolitanët dhe shqiptarët janë të ngjashëm”, ka deklaruar Giufredi.
Kujtojmë që Hysaj iu bashkua Napolit dy vite më parë nga skuadra tjetër italiane Empoli. /Telegrafi/